دبابيس نظام اسياس افورقي
بقلم الأستاذ: شرف الدين حسن علي
الدولة الارترية القائمة منذ الاستقلال في العام 1993 من القرن الماضي وحتى الان
فرغم معاناة شعبها من حكم نظام الجبهة الشعبية للديمقراطية والعدالة ومعاناته المريرة في كل صباح جديد.. تتواصل المعاناة على كافة الاصعده سياسيا واقتصاديا واجتماعيا وثقافيا ورياضيا.
وبالتأكيد لكي يظل حكم الجبهة الشعبية قائما ويواصل حكمه الاستبدادي فلابد من عوامل تسهل له ذلك واهمها الالة الاعلامية التي يديرها بحرفية عالية لتوجيه بوصلة الشعب اين ما شاء.. وبالرغم من انها وسائل بسيطة الا انها مع القبضة الامنية والمخابراتية للنظام اعادت توجيه شعب بأكمله لكي يبصم بالعشرة للجبهة الشعبية يااخ لما غنوا ليها (يوم شعبيت وفجر شعبيت) ويلا تعال نسوقكم عشان نعرف الاعلام الممرمغ في الطين وباقي طيش العالم بسبب الكبت والتضييق والارهاب شكله كيف وبشتغل كيف عشان نعرف جدارة الطيش دي احرزه كيف.
نظام افورقي / نظام الجبهة الشعبية للديمقراطية والعدالة الذي يفرض قيودا صارمة على حرية الكلام ناهيك عن الاعلام.. بعد الاستقلال ولسنوات بسيطه تنسم شعبه حرية على واحده ونص.. وقد كانت هناك العديد من وسائل الاعلام من صحافة واذاعات مستقله.. ولكن ضاق بيهم الحال الديمقراطي وضيقوا على الاعلام الخاص باغلاق كافة الصحف اللي كانت بتصدر فترة التسعينيات واعتقال العديد من الصحفيين والزج بهم في المعتقلات منذ بداية الالفية الجديدة.. ووصل الامر الى اعتقال اعلاميين تابعين للدولة واعلامها الرسمي.. امثال الاذاعي صالح جزائري والصحفي الرياضي جمع كميل والاعلامي السويدي / الارتري الاصل داويت اسحاق وهلمجرا من قبيل الاعلاميين منهم من قضى نحبه بحسب تقارير لمنظمات مستقله.. ومنهم ما لا يعرف عنه شيئا حتى اللحظة مع العلم بان عقدين من الزمان مرا على تلك الحملة التي خصصت للمجال الاعلامي ومنها بدا تضييق الخناق.
نظام الجبهة الشعبية يمتلك تلفزيون رسمي Eri Tv وقناة ارضية لنقل فعاليات المباريات وتحديدا الدوري الانجليزي ودوري ابطال اوروبا بس يعني كان في كلاسيكو والارسنال لاعب الا تمشي تشوف ليك قريب ولا حبيب تشوف معاهو.. لانهم ما عندهم شغله بباقي الدوريات وعلى حس الارسنال في الزمن داك دولة عن بكرة ابيها تشجعه.
وهناك اذاعة تبث بالتجرنيا والتقري والعربية وست لهجات ارترية اخرى وتتفاوت في ساعات بثها ولكن نصيب الاسد للتجرنيا والتقري وبعدها العربية التي يعدونها لغة رسمية الى جانب الانجليزية والتجرنيا واذا كان جمعت كلها ما بتفوت ليها كم طاشر ساعه.
وهناك خمسه صحف الاولى والشعبية (حداس ارترا) بالتجرنيا يومية عدا الاثنين والثانية في الصحف (ارتريا الحديثة) تصدر تلاته او اربعه ايام في الاسبوع و (ارتريا حداس) بالتقري تطبع كل اربعاء وصحيفة (ارتريا بروفايل) بالانجليزية تصدر يومان فقط.. الى جانب موقع الكتروني لوزارة الاعلام اسمه (شابايت).. والحزب عنده المطبعه وبصدر كمان مجلة تسمى (الامانة) اتخيل.
وارتريا كل عام في منافسة حامية الوطيس مع كوريا الشمالية في المركز الطيش في مؤشر حرية الصحافة.. اذا ما جات ال 179 تلقاها ال 180... وده لانه في تضييق كبير على حرية الصحافة والاعلام.. واي خبر يتقال لازم يمر عبر مراحل غربله وما اي خبر يتنشر ان بقى رياضه زاتو ممكن ما يتنشر.
وكل الاخبار زي ما تقول حشو سااي.. والمعلومة لا تملك لمواطني الدولة طال الزمن ام قصر لانها (مسطير يو) وتقريبا اكبر خبر بث على وسائل الاعلام الارترية وعلى الهواء مباشرة اتفاقية سلام شرق السودان في العام 2006 والله اعلم يمكن اكبر انجاز.. الباقي كله من استقلال الدولة دي وحتى الان.. اخبار حفر ترع.. وشق قنوات.. وزرع اشجار.. وتقييم لاجتماعات اقليمية سنوية وحملات تطعيم ونفير زراعة وشق جبال تقول مساجين محكوم عليهم بمؤبد و(كابيني منستريتات) ده كمان بجي صور وخبر من الرئاسة.. تلتين سنة زي ده لا جديد يذكر سوى قديم يعاد بالكربون.
اعلام فارغ محتوى.. وشعب ما يعرف يجيب المعلومة من وين... واتخيل معاي انه ثلاثة عقود بالتمام والكمال شاكلة الاخبار زي اخبار اليوم تحديدا 4 مايو 2022 بالعربية في تلفزيون ارتريا الساعه 10:30 GMT وكانت... محليا:-
• الحوادث المرورية في عنسبا
• تعريف طلاب عصب بقانون المرور
• تكريم طلاب في عرزا
• ارتياح لخدمات اجتماعية في ايتقرني
• نفير حماية اشجار في عد عمر
• عالميا وده العجيب في امره..
برضو ثلاثه عقود خير شر.. ومما ندر تلقى خبر اقليمي او لدولة جارة يعني من اثيوبيا ولا السودان ولا جيبوتي ولا اليمن ولا السعودية.
يااخ اقرب خبر تلقى من مالي ولا انجولا ولا اوروبا ولا شرق اسيا واي حاجه فيها مغرزة للامريكان بجيبوها وينظروا فيها كمان بالتجرنيا لانه سواقة العربي ما بقدروا عليها وبتدخلهم في مشاكل.
ومثال للسخف ده برضو في نشرة اليوم العالمية..
الغاء اتفاقيات المجلس العسكري في مالي مع فرنسا..
الاتحاد الاوروبي والحظر النفطي لروسيا..
خبر كوري ج / كوري ش..
وحاجه عن منظمة الصحة العالمية..
ده حال البلد المتحكم فيهو نظام فارض ديكتاتورية تنافس كوريا الشمالية منافسة شرسة في اي حاجه.. وافورقي قريب ويورث ليكم ولده.. وينقلوا الفعاليات عبر التلفاز للوريث العظيم.. والجبهة الشعبية تخم وتصر بعد داك.
بالنسبة لشبكة المعلومات ووسائل اتصال اخرى.. تخيل انه في هاتف نقال.. يااااخ تحويل رصيد سااي خش فيهو بعد كم سنة.. غير انه تتكلم وبس ما عندك اي فائدة منه.. ده غير انه تمتلك شريحة الزيك منو.. وعشان ما تطلعه اجراءات امنية وبوليسية ومخابراتية التقول انت ارهابي.. يعني خدمات انترنت حتى اللحظة مافي في الهواتف النقاله.. يعني مافي مدونين ولا يحزنون.. يعني ما تقدر تستفيد من التكنلوجيا دي ابو نكله وشعب معظم اولاده في الخارج.. يااخ ديل وصل بيهم الحال انه وفي فترة قريبه جدا جدا عشان تحاول تتكلم مع اي رقم موبايل في الاقاليم.. ووووين انت وحظك يعني.. شختك بختك.. (نسخا وعِديلكا).. يا اتكلمت يا قعدت نهارك كله تضرب.. واذا ما صبرت وانت مغترب تفك التلفون في البلاط وتتخارج منه.
وده كله عشان الشعب المسكين ده ما يلقى مصادر اخبار.. ولا يعرف الدنيا دي فيها شنو.. تتخيل انه في دولة في العالم غير كوريا الشمالية بتعمل في شعبها كده.. يلا ده نظام الجبهة الشعبية شغال كده ولهسي في ارتريا.. واتخن تخين ما يقدر يقول بغم.
نظام ادخل البلاد في عديد المشاكل وجعل عاليها سافلها.. وبعد ده يجيك واحد ويقول ليك نعمل مصالحة معاهم.. ولا نديهم فرصة تانية.. ولا يقول لينا الله غالب هم الافضل الموجودين على الساحه... وده كله طبعا بمساعده من الجداد الالكتروني الفكته الجبهة الشعبية حول العالم.
واتخن تخين تقول ليهو امشي ارجع ارتريا.. الله اعلم يقطع منك السلام.. ويقول ليك ليه ما كلامي صاح ودي معلومات مغلوطه البتتقال ليكم.. والناس مفروض تدعم بلده وخطرفات سياده وطنية وتوزيع صكوك الوطنية.
عاوز تدعم بلدك ما تنظر لي من بره.. امشي خش جوه ونظر.. امشي خش جوه واتكلم.. وقضيها زرع اشجارع وحفر ترع.. يااخ تلتين سنة كان اتبنى اخدود.. وبعد ما اتقال الكلام النجيض من رأس نظامه وقال فشلنا في بداية السنة دي موش في سنة جمعه ليكم في التلاتين سنة وبرضو عاوزينهم يحكموا البلد الشعبها بقى مشتت في بقاع العالم وما معروف اجياله دي تتلم تاني كيف.
ده غير ملفات كتيرة الجبهة الشعبية ضيعت فيها البلد واكبر ضياع كان تشريد ثلثي السكان والعودة مرة اخرى لحياة اللجؤ والذل والهوان.. والغريبه من يدعى ناطق رسمي باسم الحكومة الما معروف وزراءها منو يقول لينا ده مخطط دولي لتهجير شعب ارتريا.. (وع / بع) يااااخ معقولة.. كلامك ده جاهل ما بقبله خلي باقي العالم.
برضو بنقول الكورة في ملعب الجبهة الشعبية.. وباخوي واخوك تتنازل عن الحكم وتتنحى وتخلي الفرصة لغيره لانه ما انتو صلاح البلد بس وحوا الارترية ولاده.. وبتعرفوهم زي جوع بطونكم... والا تاريخكم العذبتونا بيهو ده خلاص وصل حده وانتهى وما ظنيت الشعب ده حا يتذكركم باستقلال.