حِرِیتْ واسْتِقْلالْ
قصيدة الشاعر الأستاذ: موسى ضرار
دَوْلتْ دَوْلتْ مِی تا دَوْلتْ، ومِي تُو اسْتِقْلالْ
إگِلْ مَنْ عَلَتْ لَسَوْرَتْ، وإگِلْ مَنْ عَلا لَنِدالْ
إگِلْ مَنْ سقّلَت لَمَنْديرتْ، وإگِلْ مَنْ علا لَعِلالْ
إگِلْ مَنْ كَعا دَمْ شَهَدانا، وإگِلْ مَنْ عَلا لَقتالْ
****** ****** ******
حِرِیتْ حِرِیتْ حِرِیتْ
مِی تا حِرِیتْ، حَقو دِینْ كَلْكَلا ونِسّالْ
مِی تا حِرِیتْ حَقو، مَتْلَگامْ هَلا ومَتَّعاقالْ
مِی تا حِریتْ حَقو، مَتْحَتّامْ هَلا ومَتْکَکالْ
مِی تا حِرِیتْ حَقو، حَبِسْ هلا وشِنقُو حِبالْ
حِریتْ مِي تا حِریتْ، ومِی تُو مَتْکافالْ
حَرِسْ بَدا ونِوايْ، إكِلْ ألَبُو أحا وعَطالْ
حِریتْ حِریتْ، إمْبَلْ مَظْحَيْ ومِظْلالْ
****** ****** ******
أرتريا
أرتريا ارتريا
أرتريا كُلُّو فَتّيا، وكُلُّو إبَّا لأساقِرْ
أرتريا نايْ كُلّوتا، وإگِلْ كُلّو تَنَبِّرْ
أرتريا دَمْ مُؤمِنْ كَعا دِيبَا، ودَمْ كافِرْ
أرتريا دَمْ إِناسْ كَعا ديبا، ودَمْ إسِيتْ بَعَلْ شِفِرْ
دَمْ بَظِيحْ كَعا دِيبا، ودَمْ دِنْگِلْ إگِلْ هِدايْ تَعارِرْ
دَمْ عَمْساتْ كَعا دِيبا، ودَمْ حَراسْ دَمَا قَطِّرْ
دَمْ نُئُوشْ كَعا دِيبا، ودَمْ گَنْدابْ لإيْ قَدِّرْ
دَمْ بَعَلْ نِوايْ كَعا دَيبا، ودَمْ حَرَسْتايْ بَعَلْ مِدِرْ
دَمْ فِجُّوعْ كَعا دِيبا، ودَمْ فارِسْ وحاطِرْ
أرتريا كُلُّو فَتّيا، وكُلُّو إبَّا لأساقِرْ
أرتريا نايْ كُلّوتا، وإگِلْ كُلّو تَنَبِّرْ
ارتريا دَوْلتا، ودَوْلَتْ كُلُّو تَحادِرْ
دَوْلَتْ حَقُو مُهُورْ سَكِّى مِنَّا, وفَگِّرْ
كَفَوْ إگِلْ تَافْرى، وكَفَوْ إگِلْ تَعَمِّرْ
ومَدْرَسَتْ مَعَلِّمْ ألَبا، كَفَوْ قاوِي تَمْهِرْ
وأَفْ أنْجابْ ألْبُو، سِگا وظُنُوعْ إيْ مَچِّرْ
أرتريا كُلُّو فَتّيا، وكُلُّو إبَّا لأساقِرْ
أرتريا نايْ كُلّوتا، وإگِلْ كُلّو تَنَبِّرْ
مِسِلْ نِتْگامى، ومِسِلْ نَتْمَاكِرْ
أدْحِدْ إيْ نِقْبَبْ، وأدْحِدْ إيْ نِسَابِرْ
إكِيتْ إيْ تَرَتِعْ، وأكُّويْ إبْ إكِيتْ إيْ بَطِرْ
وأكُّويْ حَقَوْ تَعايَرَوُو، لآكى و گَرْ گِرْ
وسَنِّيتْ إبْ گِدْلاتْ مَظِّيئْ، وإبْ سَبِرْ
بَعَلْ حِيلَتْ إبْ إديهُو، زَبَّطْ وقَيِرْ
وحِيلَتْ ألْبُو، إبْ أفُوهُو لتَّهاگى وفَكِّرْ
كِلْ أَوْرَوْتْ إبْ سِلاحُو، عالِمْتُو وعاگِرْ
****** ****** ******
أرتريا كُلُّو فَتّيا، وكُلُّو إبَّا لأساقِرْ
أرتريا نايْ كُلّوتا، وإگِلْ كُلّو تَنَبِّرْ
أبَايْنا أَوْرَوْتُو، چِيقْطايْ وجائِرْ
جاهِلْ إيْ لَعَلِّمْ، وحَقْ عالِمْ إيْ لأمِّرْ
بُئُوسْ إيْ لَعارى، وفُنْطُورْ إيْ لَحابِرْ
عالِمْ زَبِّطْ وسِياسي، بَرئْ قَتِّلْ ولأسِّرْ
لأگَوْني ولأتْقارِبْ، لأتْمَاگِبْ ولأتْجافِرْ
عَيقبايُو تَلايْ تُو، وحِگى هُوْ سَاترْ
أكُّويْ ودّى ولتْبَرى، لَحَسّى ولأنَكِّرْ
أرتريا كُلُّو فَتّيا، وكُلُّو إبَّا لأساقِرْ
أرتريا نايْ كُلّوتا، وإگِلْ كُلّو تَنَبِّرْ
أَوْرَوْتْ مَلَّهَيْ ألَبُو، ادِى ألَبُو وإگِرْ
حَتِّى إزْنُو ظِمِّتّا، وحَتِّى عِنْتُّو عِوِّرْ
كُمْ مُرادُو إيْ وَدّى، وأبْ دِرارُو إي لَعَيرْ
مِسْتَقْبَلْ أَلَبُو، إمْبَلْ مَوْتْ وقَبِرْ
كَمْسَلا مِبلاسْ، حِيلْيايْ ودْأميرْ
هَوْبايْ سُبُورْ دَنْبَرُو، كُمْ مُرادُو إيْ نَفِّرْ
تاريكْ حَدْگا ودْ أَمِيرْ، أمْسالْ وشِعِرْ
حِكَمْ تُو وأمْسالْ، مَبالِسْ سَبْ بَدِيرْ
أرتريا كُلُّو فَتّيا، وكُلُّو إبَّا لأساقِرْ
أرتريا نايْ كُلّوتا، وإگِلْ كُلّو تَنَبِّرْ
بَعَلْ نِسالْ بُقُوعْ، طُعُومْ لِبِلْ ومَريرْ
نِسالْ ظُرُويْ بَعَلُو, إيْ لَحَبِعْ وإيْ لَچَفِرْ
بَعَلْ نِسالْ رُتُّوعْ، مِنْ وُقِلْ لأسَمِّعْ ومِنْ دِهِرْ
هِگْيا أمانْ طَعْما مَريرْتُو، وظِيناهاعِطِرْ
أمانْ حماطْتا مِنْ عَندَلْ مَرِرْ، ومِنْ ظَبِرْ
هِگْيا حَسَّتْ طَعَما مَشِگْ تُو، وظِيناها دَفِرْ
حَسَّتْ تَدَنِنْ وتاكَجِّلْ، وأمانْ تَحامِطْ وتَبْهَرِرْ
أرتريا كُلُّو فَتّيا، وكُلُّو إبَّا لأساقِرْ
أرتريا نايْ كُلّوتا، وإگِلْ كُلّو تَنَبِّرْ