قصيدة الشاعر الأستاذ: موسى ضرار

إبْ سِميتْ ربي أَنَبِّتْ، مَعَلِّمْ قَلَمْ وحَرِفْ

ربي نُؤُشْ لَعَلِّمْ وعَبِي، حَتِّى لَمْهِرْ وأَلِفْ

عالِمْ إِكِّيتْ لأسَنِّي، وقاوي سَنِّيتْ لأتَلِفْ

إِكِّيتْ للأسَنِّي، سَنِّيتْ إِيْ لأتْحَلِفْ

وسَنِّيتْ للأكى، مِنْ إِكِّيتْ إِيْ نَگِّفْ

سَنِّيتْ إب سَبرْ مَظّْئْ، وإْكِّيتْ تَحلِّفْ

إِكِّيتْ مَظِّئ وتْبَدّى، وسَنِّيتْ تَرِفْ

سَنِّيتْ بَعَلا إيْ تَحَلِّفْ، وإِكِّيتْ تِلْعِفْ

بعَلْ إدى سَنِّيتْ، ديبْ إكِّيتْ إيْ لَهَدِّفْ

سَنّيتْ لإي لأَمِر، منْ إكِّيتْ إيْ لأَسْكَفكِفْ

وإكِّيتْ للأَمِر، منْ سَنّيتْ بِلاّيُو إيْ ناگِفْ

بَارِيهْ للأظَلْمِتْ، منْ گادم طَافَحْ شَلْتِفْ

وظِلْمُوتْ للأَبَريهْ، من گِلِبْ إِيْ ظَدِّفْ

أدامْ لِسْحِتْ ولِتْگيگى، وربي لَلطِفْ

ربي شَديدْ تُو ورحِيمْ، لَعَزِّبْ ولأكَفِفْ

ربي مِنْ إساتْ لأفَگِرْ، ومِنْ قِرارْ هَاگِفْ

نُؤُشْ لِعْبى ولُورَسْ، وعَبي ربي إيْ لِكالِفْ

وُلُودْ والدُو لَعابِيُو، ووالِد إبْ وَلْدُو لَعارِفْ

وُلُودْ لِعْبى ولِسْنّى، وإبْ والْدِينُو لأدْگافِفْ

تاريكومْ إيْ لأبَدى، وعاداتومْ إيْ لِلاكِفْ

أبْ حَظُورْ تُو وحِگى، ووالْدتْ تَحَزِلْ وتَحَقِفْ

والِدْ إبْ دِرارْ لَعَيِرْ، وأُمْ دَفأتَّا تَطبى وطَفْطِفْ

إبْ نَسَالْ أُمُّو لشَنِنْ دُحُورْتُو، أوَلْ گَبِئْ وسَلِفْ

عِسْيانْ ربي حَرامْ تُو، وعِسْيانْ والْدينْ لأنَقِّفْ

عاقِلْ سَنِّيتْ لأَمرْ وإكِّيتْ، وربي گُلُولْ إيْ گَدِفْ

ميرْحاىْ نِسَّالْ عَدُّو إيْ لأرَتِّعْ، أباىْ إيْ لأكَلِّفْ

گَبيلْ إمْبَلْ نِسَّالْ لِتْوالى، وأباىْ چقِّطْ إبْ چَلِفْ

گَبيلْ عيقْباىْ ألَبُو، كُمْ أنَگِلْ لِتَّحارَدْ وكُمْ أمَدِّفْ

ظُمُومْ إيْ سَمِّعْ، وعُوقُولْ إِيْ گَيِّسْ إبْ مَكاتِفْ

حُلُّولْ إيْ قَدِّرْ، ولُگُومْ إمْبَلْ نِسّالْ إيْ لَهَاتِفْ

عُوُورْ إيْ لِرْئي، وهُودُولْ إمْبَلْ إدَىْ إِيْ لَكِّفْ

آنِف ألَبُو قُدُويْ إيْ ظينى، ومِشْمُوشْ إيْ كَنِفْ

ظينا إبْ نِسالْ إيْ لِتْفرَگْ، وطَمْطَموتْ إبْ آنِفْ

بِهْلاىْ إنْدى لِبلْ لَتْبَرى، وهُوباىْ گَلّى وقَطِّفْ

رَبي منْ بيلا وبيلُو لِنَجَّينا، ومنْ هُوباىْ شَتِّفْ

ربي منْ كايِنْ لأنْگِفِنَا، ومنْ فتَّانْ لِسْعى ولِنِهِفْ

كايِنْ لأچافِرْ وفَتَّانْ لأتدالى، وإساتْ برئْ تَحَاظِّفْ

حَالِفْ إيْ لأقَبِّلْ، وتاريكْ إيْ بَدّى دِگُمْ تُو وتالِفْ

مايِتْ إيْ لَحَيِّى، وحيايْ إيْ لِتْقَبَبْ أنْدى إيْ تَلِّفْ

گَلى شَقّى إگِلْ لِنبَرْ، وگَلى نَبِّرْ إگِلْ بِلاعْ وگِزِفْ

فَدابْ اتْ عَراتْ سَكِّبْ، وهُكُّوىْ كَدْبيتْ نَظِفْ

لإيْ حَرا حريرْ إيْ لَبِسْ، ولإيْ تَحَظَبا إيْ نَدِّفْ

منْ إلِّلي گَبِّئْ لَهَلا وجرِّي،أَزِيمْ لَحَيس وشَرِفْ

بَاظيعْ من كسلا إيْ تِتَّعرى، وكَرَنْ منْ گدارِفْ

إگَلْ مِي إِبْ دَمْ حَونا نِتِّلْهِى، وتَاريكُومْ نَكَفِفْ

كافُو مِسِلْ أبَاىْ نِتْگلاگَلْ، دَمْنا إنْدى إيْ زَفِفْ

سَميتْ عَدْنا لإيْ لَحَزِّى، مانْديرَتْنَا إِيْ لأرَرِفْ

مِنْ رِيداءىْ لَيْلا لَلأَبَتِّكْ، قيتْلاىْ جائرْ عَدُّو دَگِّفْ

مِنْ إدى قَطِرْ إبْ دَمْ عَبِّعِبْ، إدى چِيقطاىْ نَدِّفْ

مِنْ زِلامْ فِرى بشُولْ تأبَدى، ظَحَاىْ طُلُولْ تزَفِفْ

مِنْ وَحِيزْ شَتِّفْ وگَلّى، مَاىْ عِيلا قُوري إيْتْ نَظِّفْ

إگِلْ حِبَّزَتْ دِيبْ تَندُورْ، شِرّافْ دِيبْ إدى إيْ نَحالِف

أبايْنا دَرارُو لإبى، وإبْ كآرُو لِتْمَيِئْ كُمْ مِتْگارِفْ

جهادْ گِنْ ألَبُو، ومجاهدْ إنْدى إيْ تعَوَتا إيْ لَعَارِفْ

لِبّاسْ كَفنُو للَبَسْ، ومنْ عَدُّو أباىْ كَرِعْ وكَرِفْ

منْ لَتْقَتَّلْ شَهيدْ تُو، ومنْ لتَّعَوَتْ عَدُّو لأَنَگِّفْ

جهادْ بَطيرْ ألَبُو، أُسِكْ مَوتْ وعَوْتى سَادِفْ

جهادْ گِدْلا تُو وبَأسْ، بسَرْ لَحَزّى وسَرفْ

جهادْ بَهَلَلَتْ إيْ كُونْ وتِلْهِيا، كُوناتْ بُو وسَيِّفْ

جهادْ هِجِگْ أَلَبُو ودِگِمْ، تَاريكْ إيْ كُونْ وحَالِفْ

جهادْ ظِمئْ بُو وسَفْرا، تابْريكْ أَلَبُو ومِكَيِّفْ

جهادْ تِرْهانْ بُو وجِرْبَتْ، سِكابْ ألَبُو وعِرِفْ

حِكُمْ عِلْمانِي لَلحَزِى، انْجيلْ ألبو ومُصاحِفْ

كَنيسَتْ إي لأبى وجَامعْ، إگِلْ تاريكْ ومُتاحِفْ

دِيمُقراطي مُروَتْ لأبَتِّكْ، وعزَيزْ إي شَرِفْ

فِدْرالي فَنطُورْ إيْ جَمِّعْ، وفَنْتُوىْ إيْ سَقِفْ

بُئُوسْ إيْ لعارى، وعُورُوىْ إيْ لأرَفْرِفْ

دِكْتَاتُري جائرْتُو، دَمْ لِكعى ومالْ سَفْسِفْ

جائر سُلُّوطْ تُو وگُهُوفْ، بْرِيئ قَتِّلْ ودارْ قَفْقِفْ

رُگومْ تُو وبَعلْ إكِّيتْ، أكُوىْ لَعَلِمْ وإكِّيتْ لَتْوَلِفْ

رُگومْ تُو وچِيقطاىْ، أَتَّرْئِيتُّو ودِّى وتَارِيكْو لأَلِّفْ

رُگُومْ طَرّارْتُو وأبُوىْ ، وربي رحيمْ تُو ولاطِفْ

جائر زَالِمْ تُو، رحْمَتْ گِنْدابْ ألَبُو ورحْمَتْ طِلِفْ

جائر حِلُّولْ لتّاليُو وگُلُولْ، عاقِلْ إيْ لتّاليُو وطَافِفْ

چِيقطاىْ زَمِّتْ وبَلِّعْ، وسُفْرُويْ كَلِعْ ظَرُو قَرِفْ

چيقْطاي سُقرُوىْ إيْ لَبَلِّعْ، وحُكُّورْ إيْ سَفِفْ

چيقْطاي چيقُوطْ لِگْبا، چبَلْ لِبْلعْ ورْماچ لجاقِفْ

بُقُوعْ منْ نِسالُو كَلْكِلْ، وحَوانْ نِسالُو لعَظِّفْ

حَوانْ إبْ نَفْسُو للتَّلْهى، وأباي بُقُوعْ إيْ تنْكِفْ

إبْ نَفْسُو لإيْ شَنِنْ، دارُو لَحَدِگْ ومالُو كَفكِفْ

چيقْطاي لَلحَزِى، منْ إللي لَهَلاّ إي لِتْگَهفْ

تاريكُو لأظَلْمتْ ولَعرى، إب مَحْبَرْ هَگدفْ

تَحَيس إِيّئ لَلبِلْ، لأداگِعْ إگلو ورأسو لألْفِفْ

حاقِدْ حُمُومْ إيْ سَارى، وحاسِدْ شُلوحْ إيْ لأگَزِفْ

جائرْ وظُّوعْ إيْ سَدّى، وحاگِلْ تاجِرْ إيْ لأَسَلِفْ

جائرْ إي لتّحَمّى حَقُو كَفِرْ، وطُبُوسْ إيْ لأگَرِفْ

• السابق
• التالي